اتكلمنا قبل كدا عن التهوية بصفة عامة
والوقتى هنتكلم عن التهوية فى فترة التحضين او اول ايام الطير
وقبل ما نتكلم عن التهوية لازم نقول معلومة عن الرطوبة واهميتها فى فترة التحضين لاننا هنحتاجها فى موضوع التهوية دا
كتير من المربين بيعتقد ان فترة التحضين تعنى حرارة فقط
ونسى ان حرارة كويسة فى فترة الحضانة مع رطوبة قليلة اقل من 30% مثلا بيعملك تبخير اكثر من اللازم لرطوبة الجسم عن طريق الرئتين فى عملية الزفير وهتخلى الطير يشرب مية اكثر ليعوض الفقد دا وبالتالى هيتنج زرق سايل وفرشة مرطبة
كمان حرارة كويسة مع رطوبة قليلة بيخلى الفرشة رطوبتها قليلة وبالتالى بتعمل غبار مع اقل حركة للطير وكلنا عارفين يعنى اية غبار فى العنبر
وحرارة تحضين كويسة مع رطوبة عالية اعلى من 70% يعنى فرشة رطبة يعنى تكاثر ميكروبى وفطرى وكوكسيديى طوال الدورة
مصدر الرطوبة دا اية؟؟
جزء منة من مصدر مية الشرب عن طريق التبخير
وجزء منة بيجى من رطوبة الزرق
لاكن اهم جزء بيكون من عملية الزفير ودا اهم جزء لان الجزئين اللى فاتو ممكن لظروف تربية ومعدات جيدة يكون تواجدهم قليل
وعلشان يكون عندى رطوبة مناسبة اقل من 65%فى فترة التحضين او حتى طوال الدورة لازم لازم اتخلص من 4 جم مية لكل 1 كيلو لحم دجاج فى الساعة طبعا فى فترة التحضين بتكون اعلى من كدا لان استهلاك المية عالى بالمقارنة بوزن الكتكوت
وطبعا فرشة جيدة بيساعدنا لو فية رطوبة عالية
لاكن مش مهم الفرشة فى المقال دا اتكلمنا عنها كتير قبل كدا
خلينا فى التهوية
طبعا راحة الكتكوت فى فترة الحضانة مش مرتبطة بس بالحرارة لاكنها مرتبطة بردة ب سرعة الهواء او التهوية
واحنا بنكون عاوزين سرعة هواء 1 متر / ثانية فى فترة الحضانة علشان احكم على الرعاية انها كويسة لان لسة مفيش ريش
طبعا بتزيد سرعة الهواء بعد كدا الى 2 فى العمر الوسط وفى المر الكبير الى 3 متر /الثانية خاصة لما الريش يكمتل
وسرعة الهواء اللى اكثر من كدا فى فترة التحضين هتعمل نزلة برد ويبدا اول اصوات الطشمة اللى الناس بتشكتى منها فى العمر الصغير
وسرعة الهواء الاقل من كدا هتعمل احتباس حرارى
طبعا سرعة الهواء فى فترة التحضين مش بيلاحظها غير المربى الخبير
لاكن ممكن تشوف اضرارها
المتمثلة فى
* ريش متسخ
* اسهال بنى على مائى بدون مسبب مرضى
نقص استهلاك العلف والتانى نقص التحويل
معنى كدا ان سرعة الهوا دا شى مهم فى فترة التحضين
وترتبط سرعة الهواء بمستوى الامونيا اللى مرتبطة بنسة الرطوبة يعنى عند 40% رطوبة فى الفرشة ( مش رطوبة جوية ) تعمل معاك اعلى امونيا وتعمل احتقان فى فى الاغشية المخاطية للجهاز التنفسى وهنا تبدا تظهر بردة الاصات التنفسية اللى بيشتكى منها المربى فى الفترة الاولى
لاكن لو لحقها المربى وكان يقظ وشاطر فى التهوية اختفت من غير ادوية
ومن الخبرات الحقليه
انك ممكن تكون فى منطقة رطبة اصلا او موسم رطب زى الموسم اللى احنا فية دا
فى الوقت دا ممكن نتدخل بحاجة خارجية تقلل معايا نسبة الامونيا
* 1 كيلو جير لكل 50 كيلو نشارة
او
* 100 الى 200 جرام سوبر فوسفات لكل متر مربع مربع فرشة
يعنى حركة الهواء المناسبة اة التهوية المناسبة مهمة زى الحرارة بالظبط فى التخلص من الرطوبة الزايدة او الامونيا او الحمل الحرارى على الطير او الغبار
والغبار دا بلوة لوحدة
يعنى
هو بينتج من حركة الكتاكيت اصلا يعنى هو كدا كدا موجود
او تيارات هوائية شديدة جاية من برة العنبر
او نتيجة الجفاف العالى للفرشة
وطبعا لرطوبة الفرشة دور مهم فى حجم الغبار دا
طبعا حضرتك معتقد ان كلمة حجم الغبار دى مش مهمة
طيب خد عندك
كل ما ذات رطوبة الفرشة زاد حجم جزيئات الغبار نفسة ويقل حجم الجزيئة دى كل ما زاد جفاف الفرشة
وكل ما قل او صغر حجم الجزيئة بتاعة الغبار دا كل ما استقرت فى الجهاز التنفسى وهى اصلا محملة بميكروب فبتعمل التهاب وتهتك فى الرئة فساعات بتعمل التهاب اكياس هوائية والكتكوت يفتح فمة زى ما يكون مصاب ب الاى بى او الاسبراجيلس
ولو معملش العرض دا اقل حاجة هيعملها اصوات تنفسية مبكرة او طشمة
شفت ازاى ان الرعاية او التهوية او سرعة الهواء خلال فترة التحضين ممكن تعمل اصوات تنفسية مبكرة
اتمنى انى اكون وصلت الفكرة للمربى العزيز
مع تحياتى وشكرا
مهندس عاطف عبد الدايم
0 التعليقات
